إشغلي وقت فراغ طفلك بأشياء مفيدة

0

التليفزيون والتابلت والإنترنت عموماً أصبح المشكلة الأكبر في حياة أطفالنا نظراً لأنهم وسيلة الإلهاء الأولى والتي تدمر يوم الطفل وتجعله بلا هدف بل إنهم يضروا الطفل أيضاً لذلك نقدم لكِ بعض الأفكار المفيدة لتشغلي وقت فراغ طفلك.

– التليفزيون و التابلت و الموبيل و الكمبيوتر كلها أشياء لها وقت محدد مسموح كي لا تضر الطفل.

الوقت المسموح هو ساعتين في الأسبوع و من بعد 8 سنين ممكن ساعة في اليوم لكل أم تخطت هذا الوقت بمراحل و أولادها يقضوا ساعات من يومهم أمام الكرتون أو الإنترنت، بغض النظر هو ضار أم نافع حتي لو الطفل يشاهد قناه تعليمية للأطفال و الكلام ينطبق علي قناة براعم التي للأسف الشديد أمهات كتير مضايقة إنها أصبحت بإشتراك و أطفال كتير متأثرة نفسيا كأن حاجة مهمة أوي في حياتهم إختفت وليست مجرد قناة.

أفكار تساعدك على إشغال وقت فراغ طفلك:

إختاري إللي يناسب سن و شخصية طفلك و ممكن تأخدي الفكرة تطوريها أو تبسطيها حسب سنه.

1- مشاركة في تنظيف أو ترتيب البيت.
2- قراءة القصص.
3- إعملوا مسرح عرايس و خليهم هما يمثلوا لكِ القصة و أنتِ شاهديها.
4- ألواح ورق كبيرة على الحائط و يرسموا بخامات مختلفة ألوان خشب، فرشاة و ألوان مياه، ألوان أصابع الشمع، لوحة سوداء أو سبورة و يرسموا بالطباشير و ممنوع كراسات التلوين التي فيها رسومات جاهزة مطبوعة و هو يلون لأنها من معوقات الإبداع.

5- ألعاب مطبوعة يحلوها مثل الإختلافات و المتاهة و غيرها.

6- يشاهدوا  فيلم قصير أو كرتون عن قيمة معينة و تتناقشوا فيها.

7- يشاهدوا أي مشهد من فيديو و بعد ذلك تسألوا بعض فيه مثلا كانوا في مكان شكله إيه؟ لبسهم؟ عددهم؟

8- بازل فيه من أول ال 4 قطع إلى  ال 300 قطعة و أكثر حسب السن.

9- المكعبات ويجب أن نطور منها ويعمل منها أشكال مختلفة.

10- تقليد الأصوات ومعرفة صاح الصوت حيوانات أو طيور.
11- لعبة عروستي: دي ممكن تلعبيها مع ولادك و أنتِ في المطبخ يجلسوا على الباب و تلعبوا أي حاجة موجودة في الشقة حد يوصفها و الباقي يخمنوا مثلا عروستي؟ حاجة حمراء، عروستي؟ بتتاكل عروستي؟ بتتقطع عالسلطة (طماطم).

12- بدل ما نتعلم الحروف و الأرقام عالورق نحضر طبق مليان رمل أو ملح و الطفل يكتب بإصبعه بعدين تلخبطوه و تكتبوا غيره و ممكن لوحده يرسم بنفس الطريقة.

13- فصل الحاجات: مكرونة و عدس و طبقين و الطفل يفصل كل حاجة في طبق ممكن لو سنه صغير نخليه يفصل حاجات أكبر و أسهل و ممكن نطبق نفس اللعبة في فصل الألوان.

14- نعمل صلصال منزلي (كوب دقيق+نص كوب ملح+معلقة زيت+ألوان طعام ) و نعجنها بماء حتى تظبط و الطفل يعجنها بنفسه ممكن تحفظ لأسبوع في التلاجة في كيس.

15- أي أوراق تتحول لألعاب يدوية.

16- سينما: إظلام الغرفة و تعملوا فشار و عصير و يكون شخص منهم مهمته وضع الفشار في أكياس وآخر يوزع تيكت و هكذا وتشاهدوا أي فيديو حتي لو ربع ساعة ممكن مره عن الحيوانات مره طيور مره أسماك بحيث يكون معلومات للطفل.

17- مخييم في الصالة مره في الإسبوع  أو في الشهر أي كان المناسب تطلعوا مرتبة بره و تناموا كلكوا بجانب بعض مفيد جداً للأطفال إللي لسه بتتعلم تنام لوحدها هيبقي حافز حلو ليهم إننا كل فترة هنام كلنا سوى شرطها تكون بالخارج وليس في غرفة الأب و الأم حتى لا يتعلق الطفل بغرفتهما ويذهب لها يوميا.

18- خيمة: 2 كرسي و فوقهم كوفرتة أو أي خيمة بشكل بسيط الطفل يتعلم يعملها و يجلس فيها يلعب إللي يحبه بيفرحوا بيها جداً.

19- التمثيل: حد يمثل تعبير بالوجه و التاني يقول معناه (زعلان – فرحان) ممكن حد يمثل وظيفة.

20- لعبة المطعم نعمل في يوم منيو و حد يبقي طباخ و حد جرسون و كده أو أوبن بوفيه و نتعلم من خلالها أداب الطعام بشكل مبسط.

21- نعمل كيك أو كب كيك و نضع أطباق كريمة، فواكه، بسكويت و كل واحد يزين (نبعد عن عجينه السكر لأن سكرها عالي و أي سكريات كثيرة بتهيبر الطفل).

22- إجتماع عائلي: مرة في الأسبوع تجتمعوا و كل واحد يقول أكله ليوم في الإسبوع القادم و تعملوا منيو الأسبوع فطار غداء عشاء مكتوب و متعلق.

ده مهم جداً في تعليم الطفل النظام و أيضاً للأطفال إللي بتصحي ماما هفطر سندوتش جبنة بعدين تعمليه يقولك لا بيض و ينتهي الموضوع بخناق لكن مع وجود الجدول هيقولك لا بيض هتقوليله حاضر يا حبيبي هكتبها في منيو الإسبوع القادم.

و بتعلمهم الإيثار بمعني بابا مختار في يوم ملوخية و فراخ و سلطة و رز جه اليوم ده و ابنك مش بيحب الملوخية بياكل سلطة و فراخ و رز بس مش بتعمليله أكل مخصوص.

و ده ينطبق علي باقي الأيام لو الأب مبيحبش حاجة الطفل مختارها برضه سيأكل باقي الموجود و ميتعملوش مخصوص.

23- عكس الأدوار: لمدة ساعة مثلاً إبنك يأخد دور الأم و أنتِ تأخذي دوره و تعكسوا المهام أنت ترتبي غرفته و هو يرتب شئ في البيت من مهامك مثلا  هذه اللعبة د بتوضحلك إبنك كيف يراكي و شرطها عدم النقد في اللعبة لأن ممكن تلاقيه لما أخذ دورك بدأ يزعق و يضع يداه في وسطه فأكيد أنتِ بتعملي كده.

24- مكالمة: يكلم شخص من الأقارب يسأل عليه.

تفتكروا لو طفل عملناله كل التجارب و الألعاب دي في شهر مثلاً كل يوم فكرة واحدة هيطلع مثل الطفل اللي بقاله شهر معظم يومه أمام الكرتون؟!

محتوى قد يعجبك:
مقالات اخرى قد تهمك (مقدمة لك من جوجل):
شارك المقالة على:

عن الكاتب

ashgan