دروس تعليمية لجميع المراحل

اللام الشمسية واللام القمرية و الثلاث حركات الأساسية

هنقدم شرح اللام الشمسية واللام القمرية و الثلاث حركات الأساسية فى اللغة العربية مع قصة للطفل لسهولة الفهم ودى هتبقى سلسلة قواعد لغة عربية لمعظم المراحل الابتدائية اللى بيصعب شرحها لاولادنا وربنا يجعله بفائدة على اولادنا يا رب

اللام الشمسية واللام القمرية ..


الأول نعرف إيه الفرق بينهم بعد كدة نحطها فى قصة بسيطة لأولادنا علشان مايتلخبطوش فيها ..

اللام الشمسية حرف اللام فيها يكتب ولا ينطق .. لكن بننطق الحرف اللى بعدها مشدد ( عليه شدة ) ..

الحروف التى تاأتى بعد اللام الشمسية ( ت , ث — د , ذ — ر , ز — س , ش — ص , ض — ط , ظ — ل , ن )

أما اللام القمرية  فحرف اللام فيها يكتب وينطق .. واللام بتكون عليها سكون .. بننطقها لام ساكنة ..

اما الحروف القمرية فتتلخص فى جملة سهلة بها كل الحروف القمرية ليسهل معرفتها وهى : ( ابغ حجك وخف عقيمه )

اللام الشمسية واللام القمرية و الثلاث حركات الأساسية
اللام الشمسية واللام القمرية و الثلاث حركات الأساسية

قصة اللام الشمسية واللام القمرية


طيب فيه قصة حلوة قوى نقسم فيها لأولادنا حروف اللام الشمسية والقمرية ….
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

كان ياما كان ..
فى سالف العصر والأوان ..

عائلة اسمها ( الـ تعريف )
خلفوا ولدين توأم سموهم ( شمس و قمر )

وفى يوم بابا جاب لهم لعب كتيــــــــــــــــــر علشان بيحبهم قوى ..
جاب لهم 28 لعبة .. اللى هى الحروف الهجائية كلها .. وقال لهم العبوا بيهم مع بعض ..

شمس وقمر علشان وحشين اتخانقوا ..
ماما جت وقسمت اللعب دى عليهم وادت لكل واحد فيهم 14 لعبة ..

قمر أخد ال 14 حرف بتوعه وجمعهم فى جملة واحدة ( ابغ حجك وخف عقيمه ) ..
ولأن القمر اسمه اللام فيه ظاهرة قوى وبتتنطق قال لحروفه اللى هاييجى منكم بعدى لازم ينطق اللام ..

أما شمس أخد حروفه وحطهم فى أغنية ال ( ت , ث — د , ذ — ر , ز — س , ش — ص , ض — ط , ظ — ل , ن )
كل اتنين أختين حلوين .. طب واللام والنون ليه زعلانين ؟؟؟ .. خلاص خليهم اصحاب مع بعض قاعدين …….

ولأن الشمس اسمه مش بننطق فيه اللام قال لكل حروفه أنا عاوزكم تداروا على اللام وتكونوا شداد قوى علشان ماتبانش وعلشان كدة بنحط عليهم شدة …..

الحركات فى اللغة العربية ..
ــــــــــــــــــــــــــــــــــــــــ

اللام الشمسية واللام القمرية و الثلاث حركات الأساسية
اللام الشمسية واللام القمرية و الثلاث حركات الأساسية

الثلاث حركات الأساسية فى اللغة هى { الفتحة _ الكسرة _ الضمة }
ولتسهيل تعليمهم لأولادنا نعرفهم إن اسم كل واحدة فيهم مرتبط بحركة الفم فى نطق الحرف وبمكان وضعها على الحرف ..

* الفتحة .. يعنى نفتح فمنا لفوق .. لفوق يبقى نكتبها فوق الحرف بَ ..
* الكسرة .. يبقى بنكسر فمنا لتحت .. تحت يبقى نكتبها تحت الحرف بِ ..
* الضمة .. بنضم فمنا فى نطق الحرف .. ولما نضم فمنا بيعمل دائرة .. يبقى نكتبها دائرة بس ليها ديل صغنن بُ ..
* السكون .. ودى بتكون على الحرف اللى وقفنا عليه ومانطقناش معاه لا فتحة ولا ضمة ولا كسرة ..
وبتكون على شكل دائرة صغيرة نكتبها على الحرف .. بْ ..

اللام الشمسية واللام القمرية و الثلاث حركات الأساسية
اللام الشمسية واللام القمرية و الثلاث حركات الأساسية

ـــــــــــــــــــــــــــــــ

التنوين ..
ـــــــــــ
هى نون ساكنة زائدة تضاف لآخر الكلمة .. والنون دى تنطق ولا تكتب ..

طيب ازاى أولادنا يفرقوا بين الكلمة اللى فيها تنوين أو لأ فى الإملاء ؟؟
نطلب منهم لما يسمعوا كلمة آخرها نون يشيلوا النون منها لو نفع نشيله منها ومعنى الكلمة ماتغيرش يبقى تنوين لو مانفعش يبقى مش تنوين والنون جزء من الكلمة ..

مثلا .. بنتٌ .. تنطق بنتُن .. لو شيلنا النون هاتبقى بنت .. الكلمة معناها ماتغيرش ..
ـــــــ
يبقى ده تنوين ..
إنما إيمان .. لو حبينا نشيل النون هاتكون إيما .. مش هاتنفع يبقى النون هنا أصلية ..

والتنوين ثلاثة أنواع .. ويكون بكتابة الحركة مرتين جنب بعض ..


* بالضم .. بٌ ..
* بالكسر .. بٍ ..
* بالفتح .. وده لازم نحط بعده ألف .. والتنوين مايتكتبش أبدا على الألف .. يتكتب على الحرف اللى قبله .. بًا ..

والتنوين  مالهوش فائدة لغوية ولا ليه قاعدة نحطه امتى .. كل فائدته سماعية .. لتحسين وقع الكلام على الأذن .. بس ..

مقالات ذات صلة

زر الذهاب إلى الأعلى
إغلاق