وصفات سهلة

طريقة عمل الزبادي فى البيت خطوة خطوة وسهل جداً

احب اشرحلكم طريقة عمل الزبادي فى البيت خطوة خطوة وسهل جداً مع ذكر لبعض الغلطات اللى بتحصل وبالتالى هيطلع معاكم زبادى ذو قوام جيد وطعم جامد ودى طريقه علميه صحيحه

طريقة عمل الزبادي فى البيت

المكونات

كيلو لبن ,

معلقه زبادى كبيره مش علبه كامله,

معلقه لبن بودره (موجود فى السوق)
واللى ميعرفوشيروح للماركت ويقوله هات كيس لبن بودره رخيص يعنى ’

بجانب (3) اوانى وطبق.

طريقة عمل الزبادي فى البيت خطوة خطوة وسهل جداً
طريقة عمل الزبادي فى البيت خطوة خطوة وسهل جداً

طريقة عمل الزبادي :

هنقوم بذكر المراحل اولا
– البسترة
– مرحله التسخين.
– مرحله التبريد.
-اضافه البادىء(زبادى)
-التعبئه
– التخمر
-التبريد
– اكل الزبادى

 

البستره

معناها التسخين ثم التبريد المفاجىء وهى مش فى المصانع وبس لا ممكن تبقى فى البيت كمان وهقولكوا ازاى
التسخين
1- هنجيب كيلو لبن ونضعه فى اناء
2- هنضع اناء اللبن فى اناء اخر (وهو ما يطلق عليه حمام مائى) هتقولولى ليه هقولكم لو تم تسخين اللبن فى اناء واحد زى ما كله بيعمل بيؤثر على اللبن من ناحيه الطعم (الطعم الشايط) ريحه شياط
3-وضع الحمام المائى الموجود بداخله انيه اللبن على النار مع التقليب الجيد والمستمر
والتقليب هنا مفيد لكى تصل الحراره لكل اجزاء اللبن لقتل البكتريا الموجوده.
ويتم التقليب حتى قرب الغليان ونستمر فى ذلك ربع ساعه تقريبا
تمام انت كده خلصت مرحله تسخين اللبن.

 

مرحله التبريد المفاجىء

4- الغرض منها هى قتل البكتريا المقاومه للحراره اى التى لم تمت بالتسخين فتموت بالتبريد
وطريقه التبريد المفاجىء كالتالى:
بعد ما سخنا اللبن نحضر انيه اخرى بداخلها ماء بارد ويستحسن ماء بارد مع ثلج
ونشيل انيه اللبن بعد التسخين مباشره من فوق النار ونضعه بداخل انيه الماء البارد والثلج. ونترك اللبن فتره بسيطه وفى الفتره البسيطه دى هنعل الاتى.
مرحله اضافه البادىء
اى اضافه زبادى على اللبن
الكل بيروح حاطط علبه زبادى كامله على كيلو لبن ليييييه
وده كتير اوى وغلط برده لان ده بياثر على طعم وقوام الزبادى الناتج
المفروض علميا ان نسبه البادىء بتكون 2% من علبه الزبادى لكل كيلو لبن.
المهم هنجيب علبه الزبادى وناخد منها معلقه واحده كبيره والمعلقه الواحده كفايه
نروح بقى لطريقه اضافه معلقه الزبادى على اللبن
طبعا احنا سايبين اللبن بيبرد فى انيه الماء البارد والثلج
هنجيب طبق صغير ومعلقه وهناخد بالمعلقه شويه لبن من انيه اللبن اللى بيبرد ونضعها فى الطبق( شويه لبن يملو الطبق الصغير)
بعد كده نجيب معلقه الزبادى الكبيره اللى خدناها من علبه الزبادى ونحطها فى الطبق
ونجيب اى حاجه ونخلط الزبادى باللبن الموجود داخل الطبق الصغير
اى حاجه معلقه او حاجه خشب نظيفه جدا عشان نخلط الزبادى باللبن ولازم تخلط الزبادى باللبن خلط تام هتلاقى فى الاخر معلقه الزبادى مش موجوده مش شايفها وهتلاقى االلبن بقى قوامه كثيف.
وبعد تمام الخلط تضع محتويات الطبق فى انيه اللبن الموجوده فى انيه الماء البارد والثلج
بعد كده منقلبش لسه هنضيف حاجه كمان ايه هى بقى
( وهى لبن البودره)
ولبن البودره له ميزه رهيبه بيعمل على ثبات هلام الناتج ويعطى له قوام وطعم مميز
هنضيف معلقه من لبن البودره على اللبن الموجود فى اناء الماء البارد والثلج وكده يبقى
عندنا تلت حاجات موجودين داخل انيه اللبن:
_ اللبن الذى تم تبرده
_ كميه اللبن الذى تم خلطها بالبادىء
_لبن البودره
هنخلط التلاته مع بعض باى وسيله (معلقه_اى حاجه)
المهم تقعد تقلب لغايه لما تحدث عمليه الخلط التام بين الثلاثه اشياء
وكده خلصت عمليه اضافه البادىء

 

مرحلة التعبئه

نقوم بتعبه اللبن فى اكواب ( اسهل حاجه اكواب زبادى سابقه)
ونضع الاغطيه عليها
نقطه هامه ( لا يتم ملىء الاكواب الى الاخر هنملى الاكواب الى الحد الموجود فى علبه الزبادى الفاضيه وده لكى لا تلزق الطبقه الناتجه بعد عمليه التخمير فى غطاء العلبه.
وكده تم تعبئه الاكواب

 

مرحلة التخمر

ودى بقى اهم واخطر مرحله من مراحل عمل الزبادى لان هى اللى هطلع شغلك حلو
المشكله هنا فى مكان وضع الاكواب اى مكان التخمر
وفى المصانع انا روحت مصانع ودخلت جوا مكان التخمر توقعوا مكان التخمر عباره عن ايه
( عباره عن غرفه كبيره جدا وطبعا عشان الكميات الكبيره من اكوب الزبادى اللى بتوضع بالداخل)
لكن احنا غلبانين يا دوب 10 او 15 علبه بنعملهم فى البيت

ولكن احنا فى البيت دلوقتى وهنعمل ايه فيه ثلاث طرق والهدف فى عمليه التخمر هو وضع اكواب الزبادى فى جو دافىء والى وقت معين حتى يتم تجبن اللبن

الطريقه الاولى

يتم تشغيل فرن البوتاجاز لمده عشر دقائق وهنطفى الفرن خلاص كده خلينا الفرن سخن .
هنضع اكواب الزبادى فى صينيه ونحط الصينيه فى الفرن وفى الحاله دى الاكواب هتاخد من 8 الى 9 ساعات فى الفرن
وعلى فكره الوقت بيختلف على حسب درجه الحراره.

الطريقه التانيه

ودى طبعا للى مش عاوز يستخدم الفرن ويوفر فى الغاز
والطريقه دى هتستعمل فيها كهرباء يعنى خساره من كله
سواء كهرباء او غاز

المهم فى الطريقه دى هنجيب كارتونه فاضيه
وتوضع فيها اكواب الزبادى على حسب مساحه الكارتونه ويتم غلقها من جميع الاتجاهات مشعاوز فيها ولا خرم
وبعدين تيجى حضرتك بعمل فتحه صغيره يا دوب الفتحه دى تدخل لمبه صغيره وبعد ما تدخل اللمبه طبعا اللمبه دى موصله بسلك وفيشه وهتحط الفيشه فى الكهرباء واوعى تتكهرب
وكده اللمبه هتشتغل جوه الكارتونه

وبالتالى هتدى ضوء وحراره بس حراره ايه اوعى جرب انت تحط ايدك على لمبه شغاله
المهم هتسيب العمليه دى حوالى 9 الى 10 ساعات
لو فتحت بعد كده الزبادى ولقيت الجزء اللى تحت تجبن واللى فوق شرش يعنى السائل اللى بيبقى موجود بكميه كبيره جدا( ممكن تسبه شويه كمان على حسب شغلك انت)

بس الزبادى الحلو هتلاقى نسبه شرش صغيره جدا يا دوب

الطريقه الثالثه

هى نفس الطريقه الثانيه بالظبط بس الفرق انه بدل ما بتستخدم كارتونه بتستخدم
علبه مسحوق الغسيل الاوتوماتيك
بتبقى كبيره وكمان الغلاف بتاعها بيبقى احسن من الكارتونه

 

مرحله التبريد

بعد ما تخلص عمليه التخمير تشيل الاكواب وتحطها فى الثلاجه

وبالهنا والشفا

طريقة عمل الزبادي فى البيت خطوة خطوة وسهل جداً
طريقة عمل الزبادي فى البيت خطوة خطوة وسهل جداً

 

مقالات ذات صلة

تعليق واحد

زر الذهاب إلى الأعلى
إغلاق